Alde Zaharreko bizilagunen ekarpenak eta eskaerak jaso eta aztertu ostean, Zumarditxikiko 100 aparkalekuak, Lapurdi eta Alondegiako lur azpiko aparkalekuetan Alde Zaharreko bizilagunentzat erabilgarri jartzeaz gain, udalak egonaldien kostua hobiratuz, beste bi aukera jarri ditu mahai gainean: Batetik, TAOaren zabalkundea aztertzea Alde Zaharreko bizilagunek eremu gehiagotan aparkatzeko aukera izan dezaten, eta bestetik, Arrillagako aparkalekuen laster abiatuko den esleipen berrian, Alde Zaharreko bizilagunen eskura jartzea hainbat plaza. Udala, Arrillagako aparkalekuen zozketarako baldintzak zehazten ari da, naiz eta Larramendiko auzotarrek lehentasuna izango duten horien zozketan, Alde Zaharreko bizilagunekiko diskriminazio positiboa aplikatzea aztertzen ari da udala.
Epe ertainera begirako aparkaleku proposamenak ere bai
Epe motzerako alternatiba horiez gain, epe ertainerako egitasmoak ere lantzen ari da udala: Santa Klara- Izaskungo aldaparen eremuan aparkalekua sortzeko aukera esaterako, hurrengo legealdian garatuko litzatekeena, Alde Zaharrari zein herriari zerbitzu emango dion aparkaleku berria sortzeko helburuarekin. Halaber, Lapurdiko lur azpiko aparkalekua berreskuratzean, errotazio-aparkalekuak eta bizilagunentzako, egoiliarrentzako aparkalekuak ezartzeko aukera ere aztertzen ari dira.
Aparkalekuen lanketa amaitu bitartean, Zumarditxikiaren proiektuan ez da urratsik emango. Zentzu horretan, alkateak adierazi du, herritar guztien iritzi eta ekarpenak jaso ondoren, proiektua landu duen arkitekto eta ingeniariekin elkartzeko asmoa dutela proiektua berraztertu eta jasotako ekarpenak txertatzeko egon litezkeen aukerak aztertzeko.