Azken hilabeteotan berritutako parkeei, orain Zuloaga auzoko jolastokiaren berritzea gehitzen zaio. Izan ere, asteburuan, itxura berrituta zabaldu zen zoru eta jolas berriekin. Zorua kautxuzkoa da, erorketen inpaktua minimizatzeko jarria, eta jolas guztiak egurrezkoak dira, Amarotz auzoko parkearen tankerakoak.
Tolosako Udalak, azken hilabeteotan San Esteban auzoko parkea, Plaza Berrikoa edota Amaiurrekoa berritu zituen, eta 2023an zehar gauza berdina egitea aurreikusi du herriko beste hainbat haur jolastokiekin. Izan ere, udalak Tolosako jolastokien inguruko azterketa egina du, bakoitzaren egungo egoera ezagutzeko eta diagnosi horren arabera parkeetan esku-hartzeko. Hain zuzen, plan hori oinarri hartuta jarraituko du 2023an haur jolastokiak eraberritzen.
Horretarako, 200.000 euroko diru partida jaso du aurtengo aurrekontuan, iaz baino 100.000 euro gehiago, alegia. Udalaren helburua, herritarrek Tolosatzen aurrekontu parte-hartzaileen prozesuan eskatu eta lehenetsitako eskaerei erantzunez, Tolosako haur parkeak hobetu eta mota eta tamaina ezberdinetako parkeen eskaintza zabaltzea.