Beste behin, kirolak eta elkartasunak bat egin dute urteko azken egunean Tolosan. Samaniego eta Orixe herri ikastetxeetako kirol batzordeek antolatutako San Silvestre krosa ospatu baita arratsaldean, Tolosako Udalaren laguntzarekin. Iaz azken unean bertan behera geratu zen XXIV. edizioa, baina aurtengoan berreskuratzea lortu dute.
Eguraldia alde, eta jendetza animatu da urtea korrika amaitzera, haurrak nahiz helduak. Adin guztietako herritarrek nahiz ingurukoek utzi ahal izan dute euren aletxoa elkartasuna adierazteko. Ibilbidea 2019ko bera izan da, Plaza Zaharretik abiatuz eta Solana kalean amaituz. Korrika egitera animatu ez direnak animoak eta txalo zaparradak izan dituzte korrikalarientzat, eta giro ederra sortu dute guztiek Tolosako kaleetan zehar.
Kokuyo elkartearen alde
Urteak pasa dira Samaniego ikastetxeak Kolonbiako Guillermo Leon Valencia eskolarekin senidetze hitzarmena adostu eta sinatu zuenetik. Azken urte hauetan elkarlan proiektuak irakurketaren bultzada izan du helburua, Bibliomandoa proiektuarekin. Irakurketaz gain, ahalegina elikadura burujabetzan eta familien sostenguan jarri dute. Ekoizpena babesteko etxe ondoko baratzak indartu dituzte. Azken urteetan, galdua zuten kultura berreskuratu nahi dute eta hazien gordailua sortu. Gehienbat emakumeek hartu dute proiektu honen erantzukizuna, eta 50 familiek jasoko dute proiektu horren babesa. Horregatik, Elkartasun Krosean lortu den dirua Kokuyo elkarteari bideratu diote.