Tolosako Asanblada Feministak Euskal Herriko mugimendu feministarekin bat egin du eta emakumeenganako egiturazko indarkeria matxistari esker sostengatzen den sistema salatu du. "Erailketa da indarkeria horren muturreko adibide gordinena, baina egunerokotasunean beste hamaika forma hartzen ditu indarkeria instituzionalean, laneko indarkerian, harremanetako indarkeria psikologiko nahiz fisikoetan, jai giroko eraso matxistetan…".
"Nazkatuta gaude!"
Gehitu du nazkatuta daudela erasotuak eta erailak izateaz eta indarkeria matxistari aurre egiteko lehen mailako arazo politikotzat hartua izan dadin eskatu du. "Egungo jarrera konplizeak alboratu eta bizi garen jendarte antolaketa matxistari aurre egiteko benetako neurriak behingoz har daitezela exijitzen dugu. Indarkeriarik gabeko bizitzak eraiki ditzagun".
Horrekin batera autodefentsa feministarako deia egiten du mugimendu feministak, "gure bizitzak direlako jokoan daudenak eta bizitzaren aldeko apustu erradikala egiten dugulako. Feministok erantzuteko prest gaude! Martxan jarraituko dugu, elkarrekin borrokan denak aske izan arte! Antolatu eta batu mobilizazioetara!".