Kirolagunak Kirol Elkarteak ohar bat zabaldu du, azken urteetan antolatzen ari diren areto futboleko Shanti eta Arsenal txapelketen inguruan. «Umeengan nork pentsatzen du?» izenburupean, aurrera begira txapelketa horiek ezingo dituztela antolatu azaldu dute: «Tolosako Udala eta Gipuzkoako Foru aldundiaren aldetik Shanti eta Arsenal txapelketak antolatzeko jaso ditugun oztopo, traba eta zailtasunak direla medio, Kirolagunak Elkarteari ezinezkoa izango zaigu datozen txapelketak antolatzea».
Elkartetik gaineratu dutenez, «gure helburua, Shanti Kirolakek eta Arsenal elkarteak ekin zioten lanari jarraipena ematea izan da hasieratik, umeek txapelketa hauek jokatzeko duten ilusioa eta ametsa betetzeko». Bide batez, laguntza eskaini dieten guztiei «eskerrik beroenak» eman dizkiete. «Pena handiz, gure ibilbidea utzi diguteneraino izan da» esanez bukatu dute oharra.