Tolosako Sarek egun hauetan oraindik etxe askotan hutsune nabarmenak daudela adierazi du. «Euskal preso gehienak gertuago dauden arren, bidea ez dela hemen amaitzen esan nahi dugu, helburua etxeratzea baita. Asko dira legeak dion baldintza guztiak beteta ere, baimenik jasotzen ari ez direnak. «Etxeratze prozesua bururaino eraman arte, elkarlana, aktibazioa eta mobilizazioa bultzatuko dugu elkarbizitza eta txeratze prozesuan».
Hori dela eta, bihar, ostirala, elkarretaratzea egingo dute Tolosako Trianguloa plazan, 19:30ean. Ondoren, euskal presoen aldeko topa egingo dute. Bestalde, urtarrilaren 7an, Autonomia kalera betetzera goaz lelopean Bilbon egingo den manifestaziora joateko deia luzatu dute. Autobusean izen emateko honako leku hauetan dute aukera herritarrek: Xirimiri, Asteasuarra eta Amaiur tabernetan. Autobusa 15:00etan irtengo da Santa Klaratik.