Tolosak abenduaren 24ko eta urtarrilaren 5eko ohiko kabalgatak berreskuratuko ditu eta, horrenbestez, tolosarrek, eta bereziki, etxeko txikienek, Olentzero, Mari Domingi eta Errege Magoak herriko kaleetan ohiko eran ikusteko aukera izango dute. Izan ere, iaz, osasun egoera zela eta, ez zen kabalgatarik egin eta horren ordez, ibilbide alternatiboa egin zen.
Kabalgatak ohiko izaerarekin
Horiek horrela, hilaren 24an Olentzero eta Mari Domingi aterako dira 17:30ean Santa Klaratik, kalez kale ibiltzeko. Errege Magoak, aldiz, urtarrilaren 5ean helduko dira eta kabalgata 18:30ean irtengo da, leku beretik. Bi kasuetan, ibilbidea ondorengoa izango da: Santa Klara, Naparzubia, Solana kalea, Atadi kalea- Korreo kalea (beherantz) – Gorriti plaza – Rondilla kalea (gorantz) – San Frantzisko pasealekua – Oria kalea.
Goizez, Gure Zirkuan
Kabalgataz haratago, aurten ere, bai Olentzero eta Mari Domingi zein Errege Magoak Gure Zirkuan izango dira goizez, bertara joan nahi duten haurrak agurtzeko prest. Aurtengoan, baina, ez da beharrezkoa izango gonbidapenak aurrez hartzea eta sarrera librea izango da. Bisitak 11:00etatik 14:00etara egin ahal izango dira.
Ohiko kabalgatez gain, Tolosako Udalak beste hainbat ekintza antolatu ditu txikienei zuzenduta, hala nola, haur parkea, Olentzaroren Basoko bisitaldiak, marrazki lehiaketa edota jaiotza lehiaketa. Azken honen kasuan, izen ematea zabalik egongo da hilaren 12tik 30era bitartean eta jaiotzak Gure Zirkura eraman beharko dira urtarrilaren 4an. Urtarrilaren 5ean bertan egongo dira ikusgai eta sari banaketa Errege Magoek egingo dute egunean bertan, Gure Zirkuan.