Tolosako Ekinbide Etxeak entretenimendua eta kultura herritarrengana helarazteko helburuarekin jarraitzen du, ekimen berriak eta askotarikoak sortzen. Horrela, maiatzean, Musikenerekin lankidetzan, formatu txikiko kontzertu batzuk antolatu zituen, guztira lau, Maiatzeko Doinuak izenburupean.
Orain, berriz, larunbat honetan, hilak 10, mikroantzerki-maratoia antolatu du Topic-eko antzokian. 19:00etan hasiko da, eta guztira 68 minutuko iraupena izango du, hiru piezatan banatuta: Deus ex Twingo (20 minutu), Gaizki (23 minutu) eta Carmenen zain (25 minutu). Helduei zuzenduta daude eta euskaraz izango dira. Sarreraren prezioa 10 euro da.