Plaza Berriko eta San Estebaneko parkeak itxura berritzeko bidean dira. Izan ere, Tolosako Udalak, herriko haur parkeak hobetzeko lanketan, bi guneetan jolas eta lur berriak jartzeko lanak abiarazi ditu; lanak datorren astean amaitzea aurreikusten dute.
Baina San Estebanekoa eta Plaza Berrikoa ez dira izango udalak berrituko dituen jolastoki bakarrak. Horiekin batera, datorren urteari begira herriko beste hainbat parke berritu eta hobetzea aurreikusi dute, herritarren eskari eta proposamenei erantzuteko. Eta hobekuntza lan horiez haratago, aurrekontu parte-hartzaileetan Larramendi auzoan jolas-kirol gune bat eraikitzeko herritarrek egindako proposamena txertatu du 2023ko aurrekontuetan, datorren urtean garatzeko.
Udalaren helburua da, pausoz pauso, herriko jolastoki guztiak berritzen, hornitzen eta hobetzen joatea, Tolosako haurrei jolas gune egokiak, dibertigarriak, seguruak eta askotarikoak eskaintzeko.