Gizarte osoak minbizia duten pertsonei babesa emateko, ikertzaile, osasun-langile, boluntario, psikologo eta gizarte- langileekin konpromisoa hartzeko eta ikerketa onkologikorako dirua biltzen laguntzeko helburuarekin, larunbatean, diru-bilketa egin zuen Minbiziaren Aurka Gipuzkoan elkarteak Tolosan.
Boluntario askok parte hartu zuten elkartasun ekintza honetan, herriko zenbait tokitan jarri ziren mahaietan banatuta. Horrez gain, herritar ugarik egin zuten bere ekarpena, eta guztira 5.342,11 euro bildu zituzten. Herritar horiei guztiei eskerrak eman dizkie elkarteak.
Ekarpen ekonomiko hori ikerketa onkologikorako eta elkartearen doako zerbitzuak sustatzeko erabiliko dute. «Ikerketa onkologikoko proiektuak finantzatzen eta paziente eta senideei laguntzeko programak egiten jarraitu, eta gaixotasunaren prebentziorako eta detekzio goiztiarreko kanpainak egiten jarraitu ahal izango dugu. Elkartearen zerbitzu guztiak doakoak dira eta, beraz, diru-bilketa bezalako ekimenak ezinbestekoak dira hauek mantendu ahal izateko».