Berria Zabalik kanpaina aurkeztu dute gaur. Berria egunkariaren kanpaina da eta helburua da Tolosako merkatari txikiei ikusgarritasuna ematea. «Saltoki txikiek bizitza ematen diete herriei, eta ezinbesteko eragileak dira herritarrentzat». Egitasmoaren helburua tolosarrak euskaraz kontsumitzera animatzea ere badela azaldu dute, eta hizkuntza bera gerturatzea beraien egunerokora.
Kanpaina bi kolpetan gauzatuko dela esan dute. Lehenengoan, egitasmoan parte hartu nahi duten merkatariek izena eman beharko dute horretarako prestatu den online formulario batean bihartik azaroaren 4ra bitartean.
Sariak parte hartzen duten bi aldeentzat izango dira. Izan ere, batetik, Kutxabank-ek diruz babestuko du Tolosako dendetan gastua egiteko 1.000 euroko bonua, eta, bestetik, Berriak 1.000 euro banatuko ditu kanpainan parte hartu duten saltokien artean, Berria egunkarian publizitatea erabiltzeko.