Azken urteotan, Tolosako Udala Amarotz auzoko Auzo-Etxe eraikin ondoko espazioa eraberritu eta berrantolatzeko lanetan aritu da Tolosako Udala. Estalki berria eta naturan integratutako jolas-gunea eraiki ditu bertan. Horretarako, parte-hartze prozesua egin zuen auzotarrekin eta bertatik ateratako ondorio zein ekarpenei erantzunez diseinatu eta eraman ditu aurrera lanak, proiektua auzotarrekin partekatu eta haiekin adostu ondoren.
Eraikitako estalkia erabilera anitzeko espazio modura diseinatu dute, eta anfiteatro txiki bat eta harmailak ditu, auzoan antolatzen dituzten ekintzak bertan egin ahal izateko. Naturan integratutako jolas gunea, halaber, egurrez eraikitako elementuz osatuta dago, inguru naturala ahalik eta gehien errespetatuz, zuhaitzak mantenduz eta gune berde ahalik eta zabalena bermatuz.
Uda amaieratik daude, hain zuzen, bi espazio horiek erabilgarri, eta azken hilabete honetan, estalkiko harmailak jarri dituzte. Orain, berrantolaketa lan guztiak amaituta, irekiera ekitaldia antolatu du udalak, biharko. 18:00etan, Porrusalda erromeria ikuskizun musikatua egingo dute, Miruren telebista saioko abestiekin, haur eta familiei zuzenduta. Auzo-etxe eraikinaren ondoko estalpean izango da ekitaldia.
Eremuaren berrantolaketak jarraipena ematen die azken urteetan udalak auzoan egin dituen lanei, hala nola, frontoi inguruko eremuaren berreskuraketa, asfaltatze lan ugari eta Auzo-Etxearen berritzea. Lan horiek guztiek helburu dute tolosarrei eta, bereziki auzotarrei, gozamenerako, aisialdirako edota elkargunerako espazioak dituen auzoa eskaintzea.