Gaur egun, Internet zein mugikorraren erabilera goiztiarra kezka orokorra bilakatzen ari da, are gehiago haur, nerabe edota gazteen gurasoentzat. Hori horrela izanik, Tolosako hiru ikastetxeetako guraso elkarteak eta Tolosako Udalak Altxa burua! ekimena abiatu dute, Tolosatzen Eskola Irekiaren egitarauaren baitan. Horrela, bihar, helduak, teknologia eta seme-alabak hizpide izango duen mahai-ingurua egingo dute Topic-en.
Jardunaldia doakoa izango da eta bertan parte hartuko dute Telmo Lazkanok, bigarren hezkuntzako irakasle eta No Phone challenge proiektuaren sortzaileak, Jon Bustillok, EHUko ikerlari eta irakasleak, eta Miren Ros hezitzaileak. Hirurek mugikorraren erabilera desegokiak sortzen dituen ondorioak aztertuko dituzte bertaratzen diren guztiekin.
Mahai-ingurua arratsaldeko 18:30ean hasiko da eta Tolosatzen Eskola Irekiaren baitan kokatuko den hitzaldi sortako lehena izango da, 2022-2023 ikasturterako beste hainbat hitzaldi zein jardunaldi aurreikusi baitituzte. Egitarauaren berri aurrerago emango du udalak.