Jon Ander Peña Peña II.ak uko egin dio Lau eta Erdiko Eusko Label Txapelketa jokatzen jarraitzeari. Pilotari tolosarrari gaur egin dizkioten azterketen arabera, zuntz-haustura txiki bat du eskuin izterrean eta, ondorioz, kantxetatik kanpo egon beharko du datozen asteetan. Enpresak igorritako oharrean ez dute sendatze-denbora zehaztu, fisioterapia tratamenduari ekin diola baino ez du aipatzen, baina txapelketan jarraitzea baztertuta, atzoko Jokin Altunaren aurkako partidak balioa galdu du. Hori dela eta, amezketarrak, Peio Etxeberriarekin eta Dariorekin batera hiruko ligaxka osatuko dute, finalerdietarako bi txartelak jokatuz.
Txapelketaren araudiak honako hau dio: «Final-laurdenetako ligaxkaren lehen jardunaldiaren ondoren pilotariren batek ezin badu txapelketan jarraitu, final-laurdenetako-ligaxkaren sailkapena burutzeko txapelketan jarraitzen duten pilotarien emaitzak baino ez dira kontuan hartuko, erretiratutako pilotariaren kontra lortutako emaitza baztertuz».
Astebururako programatutako jaialdien kasuan, oraingoz, enpresek ez dute ezer adierazi, baina litekeena da bigarren jardunaldiak aldaketak izatea, ostiralean Tafallan jokatzekoa zen partida bertan behera geratu baita.