39 urte bete dira gaur Joxi Zabala eta Joxean Lasa desagerrarazi zituztela. Urteroko hitzorduari huts egin gabe, Zabalaren eta Lasaren senide eta lagunak bildu dira Tolosako Olarrain auzoan dagoen haien monolitoen atarian. Adar hotsak iragarri du omenaldiaren hasiera. Bertsoak, ohorezko agurra eta ohiko lore eskaintza izan dira ondoren, eta beste batez, guztiek argi utzi dute haien memoriak bizirik jarraitzen duela.
Horrez gain, beste behin, egia exijitu dute: "Gaur egun oraindik batzuek ukatzen jarraitzen dute beraiena ez den errelato bat egon badagoela. Honekin, gatazka honetan izan duten erantzukizuna, eta gatazka beraren izaera politikoa ezkutatu nahi dute. Zoritxarrez, hemen gauden guztiok, gure haragitan sufritu dugulako, badakigu ukatu nahian dabiltzan kontakizun hori existitzen dela, eta sufrimendu askoren gain eraikita dagoela".
Era berean, Estatuak gatazkan izan duen ardura errekonozitu behar duela eskatu dute: "Herri honetan oraindik argitu gabe jarraitzen duten pasarte beltz ugari daude. Gerra Zikina, milaka tortura kasuak, gaur egun oraindik desagertuta jarraitzen duten euskal herritarren kasuak edota segurtasun indarrek hildako ehunka eta ehunka euskal herritarren eta militanteen kasuak. Herri honek agertoki demokratiko bat eskura dezan, bakea eta askatasuna lor ditzan, gertatu zena argitara atera behar du. Horixe baita herri honen determinazioa etorkizunerako. Eta etorkizun hori, ezingo da abiatu iraganak utzitako guztiaren egia, aitortza, justizia eta erreparaziorik gabe. Omenaldirik onena bakea eta askatasuna irabaztea da".