Nikaraguako piper opilak, Saharako tea, Ukrainako haragiz beteriko benderekiak, Hondurasko artozko opiltxoak, Senegalgo fataya, Palestinako falafela, Dominikar Errepublikako juka eta haragiz beteriko kroketak, Venezuelako arepak edota Kolonbiako enpanadak eta juka ogia. Hori guztia dastatzeko aukera izan da Zutani elkarteak antolatu duen Pintxo Tour ekimenean. Kultur aniztasuna, elkar ezagutza eta elkartasuna bultzatzeko antolatu dute.
Alondegia plazan jarri dituzte postuak eta 3 euroren truke, bi pintxo eta edariaz gozatzeko aukera izan dute bertaratutakoek. Zutani elkarteak Tolosako hainbat familia eta pertsonak jasaten duten pobrezia eta bazterketa egoerari aurre egiteko egiten du lan. Araba etorbideko lokalean elikagaia banatzen dute, baina horrez gain, bestelako ekimenak ere sustatzen dituzte. Gaurko ekimenarekin, ekarpen ekonomikoa ere jaso dute Zutani elkartekoek euren jardunarekin segi ahal izateko.
Euskal Herriak ere izan du bere postua eta Peñascal fundazioko ikasleek pintxo berezia sortu dute okasiorako: Itsasbao.