Jende asko gerturatu da gaur Tolosako Xirimiri tabernara. Bertako jabea da Xabi Izagirre eta erretiroa hartuko du. 31 urte egin ditu bertan lanean eta aurretik beste 20 egin zituen Kale Nagusiko Zeru Txiki tabernan. «Bizi guztia erakusmahaiaren atzean», esan du hunkituta. Xirimiri taberna familia bat dela gaineratu du eta horren erakusle Kalean txarangak antolatutako omenaldira gerturatutako herritar guztiak.
Txarangako kideak Xirimirin elkartu ohi dira eta horregatik antolatu dute gaurko ekitaldia, eta ez dira bakarrak, Tolosa Kantariko kideentzat leku kuttuna da Xirimiri eta ez dute omenaldian hutsik egin.
«Ezusteko handia izan da, ez nuen espero, hunkigarria izan da. Eskerrak eman nahi dizkiet denei, hunkituta nago», esan du Izagirrek. Omenaldian hainbat kantu eskaini dizkiote eta txarangak kantu bat konposatu du gainera, bertan jo dutelarik. Ondoren, partitura oparitu diote lore sorta batekin batera.
