Mintzalaguna egitasmoa hauspotzeko eta MintzaPoza transmititzen jarraitzeko, MintzaPoza tonbola egingo du Galtzaundi Euskara Taldeak larunbatean, Trianguloa plazan. 11:00etatik 13:30eara egongo da martxan eta 50 saritik gora lortzeko aukera izango da bertan.
Mintzalaguna euskaraz hitz egin ohi duten pertsonak, euskaraz egin nahi duten pertsonekin euskaraz aritzeko eta elkartzeko programa da, normalean astean ordubetez. Mintzalagun taldeek gainera urtean zehar hainbat ekintzetan ere parte hartzen dute.
Bi modutara parte har daiteke, euskara praktikatuz (bidelaria) eta euskara praktikatzen lagunduz (bidelaguna). Mintzalagun bihurtzeko baldintza bakarrak, euskaraz komunikatzeko gai izatea eta astean ordubetez elkartzeko prest egotea dira.
Mintzalagun taldeetan izen ematea doakoa da eta ikasturte osoan dago irekita. Beraz, parte hartu nahi duenak herriko udaletxera edota Galtzaundi Euskara Taldearen egoitzara jo behar du izena ematera. Bestetik, online ere izena eman diteke.
Nafarroa Oinez
Beste urtebetez, Nafarroa Oinezera joateko autobusa antolatu du Galtzaundi Euskara Taldeak. Tolosaldetik Tafallara joateko aukera paregabea da autobusarena eta Alegia, Amasa-Villabona, Anoeta, Ikaztegieta, Irura, Tolosa eta Zizurkildik zuzenean joateko aukera izango da urriaren 20an. Izen ematea irekita dago urriaren 13a, osteguna, bitarte. Autobusean joateak 13 euroko prezioa du (Galtzaundikide edota atarikide direnentzat 11 euro). Izena emateko lekuak hauek dira:
- ALEGIA: Kultur Etxean.
- ANOETA: Ikastolan.
- IKAZTEGIETA: Ostatuan.
- IRURA: Ikastolan.
- TOLOSA: Galtzaundin.
- VILLABONA: Zubimusu ikastolan (zentroan).
- ZIZURKIL: Ernio bidea 9ko udal bulegoetan.
Autobusak 09:00etatik aurrera irtengo dira eta itzulera ordua 19:30ean izango da, Tafallan. Hauek dira autobusen irteera puntuak herriz herri:
- IKAZTEGIETA: Kiroldegiko aparkalekuan.
- ALEGIA: Ferreteriko geltokian.
- TOLOSA: Santa Klaran.
- ANOETA: Apaetxe baserrian.
- IRURA: Ikastola parean.
- VILLABONA: Eliza aurreko geltokian.
- ZIZURKIL: Villabonako Kale berria 9 bus geltokia.
Hemen eguneko egitaraua ikusgai:
