Beti Ikasten 2010ean sortutako irabazi asmorik gabeko kultura elkartea da. Elkartearen helburua da pertsona helduen norbanako eta taldeko gaitasunen garapena ahalik eta hoberen sustatzen laguntzea, «beti ere bazterkeria saihestuz eta gizartearen parte hartzea bultzatuz». Hori lortzeko hainbat hitzaldi eta saio izaten dituzte eta astearte eta asteazkenetan egiten dituzte saioak, 10:00etatik 12:00etara, Topic zentroan. Urrian hasi eta maiatzera bitarte ariko dira, eta urteko matrikula 150 eurokoa da.
Saioetan askotariko gaiak lantzen dituztela esan du Karmen Sanz elkarteko zuzendaritzako kideak. «Gaiak aukeratzeko garaian besteak beste, literatura, zinema, musika, zientzia, klima aldaketa, historia, politika, filosofia, osasuna edota psikologia hartzen dugu kontuan, bazkideengan formazio orokor bat lortu nahi dugulako». Unibertsitateko irakasleengana, gai zehatzetan aditu diren pertsonengana eta erretiroan urteen poderioz metatutako jakinduria partekatu nahi dutenengana jotzen dute hitzaldi edo saioak eskaintzeko. Parte hartzeko edota informazio gehiagorako bikastentolosa@gmail.com helbidera idatzi daiteke.