140 korista inguru elkartu dira gaur Tolosan bakearen alde, UNESCOren XX. Nazioarteko Bake Jardunaldia ospatu baita. Mundu mailako ospakizuna da, eta arteak eta gazteriak bakea lortzeko duten zeregina azpimarratu dute aurtengo edizioan. Hain zuzen, hiribilduaren ezaugarri kultural nagusienetako bi batu dira: arte korala eta txotxongiloak.
Goizean, Bakea, artea eta gazteak izenburupean, gatazka eta giza eskubideekin lotura duten sei pertsonak beren iritziak elkarbanatu dituzte, Topic-en. Bertara joaterik izan ez duten herritarrek, txotxongilo tailerretan parte hartzeko aukera izan dute, Larramendi eta Berazubi auzoetan eta San Frantzisko ibiltokian. Paperezko txotxongiloak sortu dituzte, Bakearen Usoa irudikatuz.
Arratsaldean, eskuz egindako uso horiek eskuetan hartu eta martxa kulturala egin dute Tolosako kaleak zeharkatuz. Ibilbidean zehar lau abesbatza zuzenean entzuteko aukera izan da: Kolonbiako Cecilia Espinosa Ganbera Abesbatza, Europako hainbat herrialdeetako abeslariekin osatutako Internacia Esperanto-Koruso, Madrilgo Gazteen Abesbatza eta Euskal Herriko Gazteen Abesbatza. Guztira, 140 korista baino gehiagok parte hartu dute.
Iluntzeko 20:00etan, berriz, nazioarteko bost abesbatzak kontzertu berezi bat eskainiko dute Leidor aretoan, eta amaieran bakearen kantu berria estreinatzeaz gain, euskal abesti ezagunak ere abestuko dituzte elkarrekin.
Hemen behean zuzenean jarraitzeko aukera izango da:
