Ikasturte berriarekin batera, BPXport enpresak hartu du Tolosako Udaleko kirol instalazioak modu integralean kudeatzeko ardura. Hori horrela, kiroldegiko instalazioen erreserbak egiteko plataforma aldatu egingo da. Irailaren 12tik aurrera, egungo plataforma bertan behera geldituko da eta bazkideek plataforma berrian sartzeko bi aukera desberdin izango dituzte: Usabalkiroldegia.com webguneko BPXport erreserba arloa bata, eta BPXport Gimnasios deituriko app-a bestea. Azken honen kasuan, kiroldegira sartzeko erabiltzen den eskumuturrekoaren ordez, sarrerako tornua zabaltzeko QR kode bat emango zaio erabiltzaileari.
Edozein dela erreserba egiteko aukeratutako bidea, erabiltzaile moduan nortasun agiria edo posta elektronikoko helbidea eta pasahitz bat jarri beharko dira. Plataforma aldaketa dela eta, bazkideek orain arte erabilitako pasahitzak ez du balioko, horrenbestez, nortasun agiria edota posta elektronikoa sartu ondoren, pasahitza gogoratu sakatu beharko da, eta zuzenean mezu elektroniko bat jasoko dute hori berritzeko.
Horrez gain, jakinarazi dute kiroldegira sartzeko txarteletik eskumuturrekoaren sistema berrira aldaketa egiteko ez dagoela epe mugarik eta bazkide izanik, inor ez dela sartu gabe geldituko. Eskumuturreko berria kiroldegian bertan eskuratu ahal izango da.