XII. Hondartza Bolei Txapelketa iritsi da bukaerara. Aste guztian partidak jokatzen aritu ostean, gaur iluntzean jokatu da finala Garia okindegia eta Iurre tabernaren artean, eta azken hori gailendu da iazko irabazlearen aurrean. Final borrokatua izan da, lehen bi setak oso parekatuta joan baitira. Lehena Iurreren aldekoa izan da, 21-18ko emaitzarekin, eta bigarrena Gariak irabazi du, 23-21, zirrara handiko bukaerarekin. Hirugarrenean, ordea, Iurre gehiago izan da, eta 15-7ko emaitzarekin lortu dute irabaztea.
Finalaren aurretik hirugarren eta laugarren posturako partida jokatu da, Ilargi eta Oskarbiren artean. Azkenean, Ilargi hirugarren geratu da, eta Oskarbi laugarren. Ikuskizun guztiaren lekuko Euskal Herria plaza bete duen jendetza izan da. DJ Bullen musikaz alaiturik, festa giroa izan da nagusi.
Toloboleik antolatu eta Tolosako Udalak eta inguruko ostalariek laguntzen duten txapelketan Tolosaldeko 39 talde mistok hartu dute parte, 250 parte hartzaile baino gehiago, guztiak eskualdekoak.