Jakina da ekintza hau burutzea oso konplexua dela, bai ekintza administratiboetan eta baita obra lanak burutzerakoan ere. Gainera, Bedaioko egoera larria eta berezia zenez, Tolosako Udalak ahalegin handia egin du emandako trataerarekin asmatzeko.
Tolosako Udaleko ordezkaritza bat, alkatea buru zela, eta Gipuzkoako Foru Aldundiko Nekazaritza eta Lurralde Orekako zuzendaritza taldea Telefonica enpresako ordezkariekin bilerak eta etengabeko gestioak egin behar izan dituzte Bedaiorako aurreikusita zeuden hedapen epeak aurreratu ahal izateko. Ez nahi bezain azkar baina azkenean lortu da.
Lehenengo arlo horretan erabakigarria izan da Olatz Peon Tolosako alkatearen papera, oso parte-hartze aktiboa izan baitu barreiaketaren esleipen prozesuan. Batetik, obra esleitu zitzaion enpresako ordezkariekin bildu zen eta Bedaio inkomunikatuta ez geratzearen garrantzia helarazi zien. Bestetik, barreiaketa egiteko obren baimenak izapidetzeko garaian, bai Tolosako Udalari zegozkionak, eta bai foru erakundeari, berehala tramitatuak izan zitezen arduratu zen. Beraz, Gipuzkoako Foru Aldundiaren eta Tolosako Udalaren arteko elkarlanak Bedaioko bizilagunei Banda Zabalaren onurez gozatzeko aukera erraztu die.