Bizkarrezurraren zaintza

Hori bezain garrantzitsua da bizkarrezurrak nerbio-sisteman duen eragina, kiropraktikoaren iritziz. «Nerbioek gure gorputzeko zonalde guztiak kontrolatzen dituzte, gihar, organo eta zelula guztiak. Printzipioz gure gorputzaren %9a bakarrik sentitzen dugu. Gainerako funtzionamendu guztia autonomoa da eta bizkarrezurraren subluxazio batek oharkabean pasatzen diren ondorioak ekar ditzake gure gorputzera».

Biona zentroan subluxazioak aurkitzeaz, aztertzeaz eta zuzentzeaz arduratzen dira, doikuntzen bidez bizkarrezurraren eta nerbio-sistemaren funtzionamendua onera ekartzen dute. «Doitzea mugimendu leuna, zehatza eta oinazerik gabekoa da», esan du Urrutibeazkoak. Horretarako, teknika ezberdinak erabiltzen dituzte eta artatu beharreko pertsonaren arabera egokitu.

Biona zentroan haur jaio berrietan espezializatuta daude: «Haur baten subluxazioaren jatorria amaren umetokian egon daiteke. Haur baten lehenengo une traumatikoa erditzea da eta prozesu horretan sor daitezkeen lesioek bizitza osoan iraun dezaketen patroiak sor ditzakete». Urrutibeazkoak zentrora gerturatzen diren kirolarien adibidea jarri du: «Gorputzari errendimendu osoa atera nahi izaten diote eta kiropraktikak horretan laguntzen die».

Gorputzak bere kabuz osatzeko gaitasuna duela dio Urrutibeazkoak. «Gure lana ornoek beren mugimendua berreskuratzen laguntzea da, zaintza hori bermatzea, gorputzak bere bidea segi dezan». Esku hartze txikiekin sumatzen den ongizate orokorra handia sumatzen dela dio kiropraktikoak.