Belarriak garbi, argi entzuteko

Horiez gain, soinuarekin lan egiten dutenentzako ere tapoiak egiten dituzte. «Musika taldeetan edota txarangetan jotzen duten batzuk gerturatu izan dira. Tapoi batzuek erabat kentzen edo estaltzen dute inguruko soinua, eta beste batzuek guk aukeratutako frekuentziak jaistea lortzen dute, iragazki batzuen bitartez».

Jarduera fisikoa egitera joatean, arrisku egoerak edo istripuak ekiditeko, belarriak osasuntsu izatea beharrezkoa dela gogorarazi du Anduezak. «Goi mailako txirrindulariekin eta auto zein moto gidariekin lan egiten dugu, eta entzungailuak erabiltzen dituzte, entzumena ez kaltetzeko. Badira ere horrelako aparatuak erabiltzen dituzten korrikalariak eta futbolariak».

Gorputzeko beste zenbait atalen moduan, belarriek ere zainketa behar dutela esan du Anduezak. «Bigarren plano batean daude; jendeak ez die behar besteko garrantzirik emate n. Begiak edo hortzak begiratzera joaten garen moduan, ezinbestekoa da noizbehinka belarriak nola ditugun ikustea. Belarriei lotuta gaixotasun asko daude, eta 50 urtetik aurrera, urtean behin azterketa egitea komeni da». Arazoak garaiz detektatzea «garrantzitsua» da bere ustez. «Berandu antzemanez gero, zailagoa da irtenbidea topatzea».

Belarriko mina «min oso gogorra» dela nabarmendu du Anduezak. «Hori ekiditeko, argizaria belarri-zuloetatik behar bezala kentzea da lehen urratsa, edo behintzat, etxean egin daitekeena». Horretarako, baina, kotoi-zotzak erabiltzea «egin daitekeen gauzarik okerrena» dela esan du. «Dutxatik ateratzen garen bakoitzean, zapi bat belarri-zuloetatik pasa, eta ahalik eta argizari gehien kentzen saiatu behar gara. Kontuz ibili behar da, argizari hori belarri-zuloetan barrurago sartu ez dadin», aholkatu du.