Amaia Elizaran dantza garaikideko konpainiak Irlandan eta Kolonbian eskainiko ditu emanaldiak datozen egunetan. Gaur bertan Irlandako Enniskillen hiriko Happy Days Enniskillen International Becket Festivalean egongo da eta bertan Arima lanaren zati bat eskainiko du. Ez da bakarrik egongo Hothouse Flowers taldeko Liam Ó Maonlaí artistarekin batera ariko baita. Jaialdiko irekiera ekitaldian eskainiko dute lanaren bertsio egokitua. Ó Maonlaík bere kanta arrakastatsuenak eskainiko ditu. Arima Elizaren seigarren lana da, sinpletasunaren edertasuna aldarrikatzen du bertan, azaletik funtsezkora doan bidaia eginez.
Bogotako Antzoki Zaharrean aldiz, Mar pieza eskainiko du Amaia Elizaranek, uztailaren 29an eta 30ean. Etxepare Institutuak sustatutako Euskal Leihoaren barruan eskainiko du lana eta zikloak musika, dantza eta antzerkiko piezak biltzen ditu. Mar eskaintzeaz gain, tolosarrak solasaldi batean eta masterclass batean hartuko du parte. Mar ozeanoaren mugimenduan oinarritzen da, eta mugimenduaren bidez atmosfera berezia sortzen du.