Paisaia linguistikoa aztertzean, EuskarAbenturan parte hartzen ari diren gazteak kaleetan, dendetan eta tabernetan dauden errotuluetan-eta zer hizkuntza nagusitzen den eta informazioa nola dagoen adierazita jaso dute. Bere hausnarketak egin eta ondorioak atera dituzte, eta segidan Kike Amonarrizen hitzaldia jaso dute, Laskorain Ikastolako aretoan. "Urtero ematen die hitzaldia Amonarrizek eta hainbat datu azaltzen dizkie euskararen inguruan", esan du Igone Mariezkurrena EuskarAbenturako komunikazio arduradunak. "Bizi dezatela euskara abentura bat bezala azaldu die, eta bizi dezatela abentura hori hilabete honetatik harago".
Bihar atseden eguna izango dute gazteek, eta gainera gurasoen bisita jasotzeko eguna izango da. Yoga saio bat izango dute arratsaldean, eta etzi Lesaka aldera abiatuko dira.