2021eko abenduan izandako uholdeen ondorioz presa puzgarriaren sistema elektronikoa matxuratu egin zen. Tolosako udal ordezkarien esanetan jada sistema konpondurik dago. Bere garaian presa puzgarria instalatu zuen Alemaniako enpresak egin ditu konponketa lanak, azaldu dutenez. "Hainbat froga ere egin ditu enpresak. Azken ikuskaritza eta froga lanak baino ez dira falta; puzgarria puzteko moduan dago", zehaztu du Olatz Peonek.
Patxi Amantegik azaldu duenez, "ur emari baxuaren ondorioz, zenbait Txirritxo txiki hegazti bikote ugaltzen hasi dira Tolosan. Txirritxo txikia espeziea kaltebera gisa katalogatuta dago. Presa betetzeak arrautzak eta txitak galtzea ekarriko luke, eta debekatuta dago ugalketa-lekuak hondatzea eta suntsitzea. Ondorioz, ezinezkoa da presa orain betetzea". Amantegik zehaztu duenez, egoeraren "jarraipen estua" egingo dute, "presa lehenbailehen bete ahal izateko".
