Mugi txartelarekin bidaiatzeko aukera izango da Tolosako hiribusean, irailetik aurrera. Hain justu, atzo onartu zuen Tolosa Mugi sarean integratzea Gipuzkoako Garraioaren Lurralde Agintaritzaren Batzarrak (GGLA).
Joxe Mari Villanueva udal talde sozialistaren bozeramailearentzat "albiste bikaina" da Tolosako hiribusak Mugi txartelarekin bidaiatzeko aukera izatea. Villanuevak nabarmendu du Rafaela Romero Mugikortasuneko eta Lurralde Antolaketako diputatua Gipuzkoako Foru Aldundian egiten ari den lana, "garraio publiko iraunkorra ez ezik, ekonomikoa eta irisgarria ere sustatuz". Garraio publikoaren erabiltzaileentzat nabarmen aurreztuko dela garraio publikoaren erabilera esan du Villanuevak, eta beraz, giltzarritzat jo du Tolosako busak Mugi txartelarekin bidaiatzeko aukera izatea. "Neurri oso positiboa da tolosarrentzat eta, are gehiago, garraio publikoaren aldeko apustu sendoa. Tolosak beste urrats bat eman behar zuen garraio publikoa ibilgailu pribatuaren alternatiba izan dadin”.