Coro Juvenil de Universidade de Lisboa abesbatzak emanaldia eskainiko du ostiralean, uztailak 1, 19:30etik aurrera Tolosako San Frantzisko elizan. IV. Kantik musika zikloaren barruan sartu dute emanaldia, udazkenean egin ohi duten hitzordua aurreratuz. Kantik-eko egitaraua prestatzen ari dira oraindik, baina Lisboako abesbatza Euskal Herrian dagoela baliatu dute, Tolosako emanaldia lotzeko.
Hodeiertz abesbatzak gogoratu du pandemiak gogor kolpatu duela abesbatzen mundua, "baina gauzak hobeto daudela dirudien honetan, eta bi urteko geldialdiaren ondoren, Hodeiertzek aukera ikusi du Kantik musika zikloaren IV. edizioa antolatzeko".
Kantik zikloan ahalegina egiten dute eskualdeko taldeei entzungarritasuna emateko eta, aldi berean, txoko berezi bat eskaintzen diete gazte abesbatzei, "beraiek direlako gaurtik hasita bidea egin behar dutenak".
Coro Juvenil de Universidade de Lisboa
Coro Juvenil de Universidade de Lisboa abesbatzak 2005ean eskaini zuen bere lehen emanaldia. Harrezkero ehunka kontzertu eskaini ditu, bai Portugalen eta bai atzerrian, eta gaur egungo gazte abesbatza ezagunenetako bat bihurtu da, kantatzearekin batera mugimendua eta antzerkia uztartzen dituen lengoaia bat sortuz. Nahasketa horri esker, musika emanaldiez gain parte hartu du orobat antzerki produkzioetan edo zinemako proiektuetan ere.
Erica Mandillo zuzendaria eskarmentu handiko musikaria da. Bere ibilbidea zientzien munduan hasi zuen arren –biofisika ikasketak egin zituen-, piano eta kantu ikasketak osatzea lortu zuen, eta zientzialari ogibidea alde batera uztea erabaki zuen buru-belarri musikan murgiltzeko. Hala, 2005ean Coro Juvenil da Universidade de Lisboa sortu zuen, haur eta gazteekin musika lantzeko modu berri baten bila.