'Ombuaren Itzala' film proiektua aurkezteko bertso festa egingo dute

Ekainaren 28an, Pello Mari Otañoren inguruko 'Ombuaren Itzala' filmaren inguruko bertso festa eta aurkezpena egingo dute Tolosako kultur etxean, 19:00etan. Patxi Bisquert eta Anjel Mari Peñagarikanok hartuko dute parte.

Eguzki Art Zinemak denbora luzea darama Ombuaren Itzala filma gauzatzeko ahaleginean. Hainbat oztopo eta zailtasunen artean, aurrera doa proiektua. Ahanzturatik aldenduta, Pello Mari Otaño poeta eta bertsolari handiaren izaera eta bertsogintza berreskuratu nahi dute, "zizurkildarraren bizitzak eta obrak geure memoria kolektiboan merezi duen eran txertaturik iraun dezan". Koldo Izagirreren hitzak jasota, filma hau Otañok merezi duen ikusgarritasuna ematera dator.

Proiektuaren bultzatzaileak sinistuta daude proiektua aurrera atera daitekeela euskaldungoaren laguntzari esker. "Herrigintzan sortzen eta loratzen baitira proiektu bizigarrienak, erakunde eta plataforma handien babesik gabe. Horrek eraman gaitu filma Euskal Herritik Argentinaraino zabaldu nahi dugun auzolanean kokatzera. Bideari ekinez, denon artean lortu dezakegu filma amaituta egotea datorren urtean".

Tolosaldera datoz orain proiektua aurkeztera. Ekainaren 28an, 19:00etan Tolosako kultur etxean izango dira Patxi Bisquert ekoizle eta aktorea eta Anjel Mari Peñagarikano bertsolaria. Bertso festa eta aurkezpena izango da. "Ausartak garenez, herrigintzan konfiantza osoa dugunez, herritarren eskuetatik jasoko dugu babesa eta laguntza nahikoa filma aurrera ateratzeko. Itxaropen horrekin gatoz Tolosaldera".

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!