Tolosari dagokionez, Tolosako Asanblada Feministak deituta egin dute protesta, Trianguloa plazan. Bihar, bi mobilizazio izango dira, bat Aiztondoko mugimendu feministak eta Akain eta Lurgatz talde feministek deituta, Villabona eta Zizurkil arteko oinezkoen zubian 19:30etik aurrera; eta bestea, ordu berean, Anoetako plazan bertako mugimendu feministak deituta. Eraso sexistarik ez! Autodefentsa feminista lelopean egingo dituzte protestak, 2003tik Euskal Herrian indarkeria matxistak eraildako 114. emakumearen heriotza salatzeko.
Barakaldon ama hil izana leporatuta 53 urteko gizonezkoa atxilotu zuen Ertzaintzak aurreko ostegunean. Emakumea apirilaren 26an zendu zen, Gurutzetako ospitalean. Erietxeko osasun langileek indarkeria zantzuak sumatu zizkioten hilotzari, auzi medikuei eman zieten abisua, eta ikerketa abiatu zuen Ertzaintzak.