Maialen Muñozek 2.38.17kko denborarekin irabazi du proba. Orain arte asfaltoan, pistan eta krosean aritu da ibartarrak, eta nahiko berria da mendi lasterketetan. Izan ere, bere lehen aldia izan da T2T proban eta irabaztea lortu du: "Aurretik hiru mendi lasterketa eginak nituen, motzagoak, baina hau esan daiteke lasterketa nabarmenago bat dela, eta oso kontentu nago irabazteagatik". Inguruan lagunak ditu mendian ibiltzen direnak, eta azkenean mendi lasterketak egiten hasi da. Pista pixka bat alde bata utzi du eta mendian hasi da entrenatzen. Gaurko lasterketa "ondo" joan dela esan du: "Urduri nengoen, eta aspaldi ez nengoela horrela. Hasieran zalantzak nituen, baina gero ondo joan da. Asfaltoan azkar joan naiz hasieran, eta gero erregulatzen joan naiz, batez ere igoeretan. Jaitsierak baliatu ditut azkarrago joateko". Marina Gonzalez irundarrak 2.44.48ko denborarekin egin du bigarren eta Irati Larrañaga usurbildarrak 2.45.32rekin lortu du hirugarren postua.
Oier Ariznabarreta durangarrak hasiera batean bi orduz azpitik egiteko asmoa zuen proba, baina azkenean 2.06.34ko denborarekin helmugaratu da. "Asmoa beti da bi orduetatik jaistea, baina zaila dago. Gaur egun polita egin du hasiera batean, euriarekin eta nahiko fresko, baina bigarren zatian asko nabaritu da hezetasuna eta sargoria. Lokatza ere bazegoen, eta nahiko labainkorra zegoen jaitsieran. Azkeneko zatian ikusi dut bi orduetatik jaisteko nahiko zaila zegoela, baina oso pozik nago egindakoarekin". Ibai Makazaga oriotarra bigarren izan da 2.13.41rekin, eta Unai Dorronsoro beasaindarrak hirugarren postua 2.14.33rekin lortu du.
Gizonezkoetan eskualdeko lehenengoa Iban Agirrezabala berastegiarra izan da, 2.17.01rekin laugarrengo postua lortuz. "Ez naiz podiumaren bila joan, jende ona zetorrelako, eta taldekide batzuk ere oso ondo zeudelako. Ni nire karrera egitera joan naiz. Ibilbidea ezagutzen nuen, baina beste noranzkoan, beraz, ziurgabetasun horrekin nindoan", esan du. "Indarrak gordetzen joan naiz, Pisuagan eta Uzturreko gailur alde horretan indarra behar zelako korrika egiteko. Laugarren postua, txokolatezko domina bada ere, sari moduan hartuko dut. Gustura nago egindako lanarekin".
Ikusi sailkapenak hemen
