Pkemboi oso gustura aritu da korrika eta uneoro lehen postuan joan da: "Ez dut atzera begiratu, eta nire onena ematen saiatu naiz". Jendeak asko animatu duela gaineratu du: "Nire izena zekiten eta animo asko eman dizkidate. Oso gustura parte hartu dut proba honetan".
Iñaki Olanorentzat (4.07.38) lehen podiuma izan da: "Ez nuen inondik inora espero bigarren postua lortzea. Aurten izen handiak zeuden, eta bi kenyarrak lehen bi postuetan egongo zirela pentsatzen genuen". Orain bi aste Zegama-Aizkorri mendi maratoia "oso sentsazio onekin" bukatu zuela esan du, "baina garbi nuen erregulatu egin behar nuela. Postuari begiratu gabe joan naiz, sentsazioen arabera. Banekien Iruran hasten zela karrera, baina Irurara nik nahi baino gehiago emanda iritsi naiz. Uzturretik Irurara jaitsiera oso gogorra da, eta toki ezaguna denez nahigabe eman egiten diozu, eta nahiko jota ailegatu naiz". Hala ere, Irurara zazpigarren postuan iritsi eta Hernion bigarren zihoan. "Aspaldi ez bezala sufritu dut, baina gozatu ere bai, ikusten nuelako postu onean nindoala". Norabide aldaketarekin "espektakuluari begira irabazi du probak, lasterketa teknikoagoa eta politagoa geratu delako, baina korrikalarientzako iruditzen zait gogorragoa dela".
Hasierako partean gozatu egin du Hassan Ait Chaouk (4.12.03), baina Iruratik gora sekulako beroa egiten hasi duela esan du, eta sufritu egin duela: "Bukaerarako ia kalanbreekin nengoen, lunbagoarekin, eta Herniotik behera asko sufritu dut. Eskerrak goraka abantaila pixka bat atera dudala. Oso gustura nago hirugarren postuarekin".
Bi kenyarrek parte hartu dute gaurkoan, eta lehen bi postuak bereganatzeko faboritoak ziren. Pkemboik proba irabazi du, eta beste kenyarrak, Matthew Kiptanuik, Irurara jaisten hirugarren zihoala, erorikoa izan eta proba bertan behera utzi behar izan du.
Lehen aldiz eta irabazi
Mayi Mujika elgoibartarrak lehen aldiz parte hartu eta proba irabazi egin du, 4.54.14ko denbora eginez. "Ni nirea egitera etorri naiz. Ikusi nuen atzo neska gutxi geundela, baina ni hanketatik gaizki etorri naiz eta banuen beldur pixka bat. Probatzera etorri naiz eta egia esan oso gustura aritu naiz". Ibilbidetik batez ere jaitsierak gustatu zaizkio: "Bide estuak zeuden, eta harria ez bazegoen lokatza zegoen. Entretenigarriak iruditu zaizkit, baina igoerek niretzako aldapa gutxi zuten, korrika asko egitekoak ziren, eta niri ez zati hori gehiegi komeni. Bestela oso polita iruditu zait, eta sentsazio onekin joan naizenez, disfrutatzen joan naiz".
Nerea Amilibia (5.23.47) oso gustura geratu da bigarren postuarekin: "Podiuma egiteko ilusio banuen, baina gero lortu egin behar da. Gorputzaldi onarekin nengoen, eta oso gustura". Ibilbide aldaketari dagokionez, esan du bukaeran Hernio igotzea "oso gogorra" dela, baina ez zuela aldatuko. 51 urte ditu zizurkildarrak: "Nire adinarekin sekulako ilusioa eta poza da podiuma egitea, eta segitzeko indarrak ematen dizkit. Banuen ilusioa podiumean sartzeko, baina beti ez da erraza izaten".
Sailkapenak ikusgai hemen
