Guztientzat maila horretako lehen txapelketa izan zen. «Lan bikaina egin zuten, denboraldiari amaiera bikaina ematea lortuz», azaldu dute klubetik. Alebinetan Pello Errota txapeldun eta Herrikide txapeldunorde izan zen. Infantiletan ere bi talde izan ziren, Tolosa 1 garaile izanik, eta Tolosa 2 laugarren.
Larunbat arratsaldean June Bengoetxea juniorrak zilarra lortu zuen banaka sokarekin, eta brontzea kidekako sailkapen orokorrean. Hori horrela, uztailean Zaragozan egingo den bere lehen Espainiako bakarkako txapelketan parte hartzeko txartela lortu zuen.
Igandean, berriz, jubenil eta seniorren txanda izan zen Durangon. «Aipamen berezia gimnasta hauen esfortzuari, entrenamenduak goi mailako ikasketekin partekatzen dituzte eta», azaldu dute klubetik. «Tapizean heldutasuna nabaria izan zen, eta gozaturiko txapelketa izateaz gain, talde guztiek domina leporatu zuten». Jubenil P taldeak zilarra leporatu zuen, eta maila bereko M jubenilak brontzea. Seniorrek urrezko domina lortuz amaitu zuten.
Gimnasta horientzat denboraldia bukatu arren, asteburu honetan Durangon izango dira berriz Tolosa CF-ko gimnastak. Oraingo honetan lau kadete taldeentzat denboraldi amaiera izango da.