Tolosako Udala Arkaute eraikineko teilatua eraberritzen hasi da, "egoera txarrean zegoelako eta segurtasuna bermatzeko eraberritze-beharra zuelako". Maldadun teilatua eta estalki laua (terraza) eraberrituko dituzte, eraikin baten kontserbazio lan gisa.
Teilatuak ur sarrera puntualak jasan izan ditu eta, horrek urteetan sortutako narriadura kontuan izanda, teilatuaren azterketa orokorra egin zuten. Bertan aurreikusitakoa oinarri hartuta, egitura puntualki sendotuko da eta, urak eragindako kaltearen ondorioz hondatuta zeuden habexka batzuk ordezkatuko dituzte. Obra zuzendaritza Arretxe Aholkularitza enpresari esleitu zaio lizitazio bidez, eta eraikuntza lana, aldiz, IZ4 Guipuzcoa S.L. enpresari. Lanak uztailaren 26rako amaituta egotea aurreikusten da eta guztira 107.190,20 euroko aurrekontua dute, BEZ barne.
Eraikin osoaren proiektu integrala
Aurtengo aurrekontu proiektuan aurreikusia dago, baita ere, eraikina barrutik erabat berritzeko proiektua egitea. Behin teilatua konpontzeko lanak amaituta ekingo zaiola proiektuaren idazketari azaldu dute udaletik.