«Oso pozik gaude. Denboraldiko helburua lortu dugu, eta igoera faseko azken jardunaldian lortu dugu, lauko finala jokatu beharrik izan gabe», esan du Julen Garcia entrenatzaileak. Azken jardunaldian berdintzea nahikoa zuen igotzeko eta 20-28 irabazi zion Tolosak Askartza taldeari. Zale ugari joan ziren Tolosatik Leioara taldea animatzera, eta han bertan ospatu ahal izan zuten denek igoera.
Denboraldia hasterakoan lehiatzeko helburua zuen taldeak, aukera izan duten asteburuetan, Garciak zehaztu duenez: «Jokalari dezente izan ditugu aurten lehen eta bigarren taldearen artean ibili direnak jokatzen, eta asteburu askotan ez dugu izan aukerarik bigarren taldean eskuragarri izateko jokalari horiek. Horren ondorioz taldearen lehiakortasuna murriztuta egon da». Urtea, beraz, ez da samurra izan bigarren taldearentzat, baina igoera fasean sartu ahal izan ziren, eta fase horretan beste maila bat eman ahal izan dute: «Orduan helburua argi genuen mailaz igotzea zela, eta lortu dugu. Hain justu, denboraldiaren zati horretan garrantzi gehiago eman zaio bigarren taldeari. Lehen taldeak ez zuen helburu zehatzik, ez zuelako aukerarik igoera postuetan egoteko eta ezta arriskurik mailaz jaisteko. Beraz, bigarren taldeak mailaz igotzeko aukera zuela ikusita, lehentasuna eman zaio klubetik. Ikusten denez, erabaki aproposa izan da».
Bigarren taldea horrelako maila altu batean izateak klubarentzat garrantzi handia duela azaldu du Garciak: «Lehiakortasun aldetik ez du zerikusirik orain aritu garen Gipuzkoako lehen mailak eta Euskal Ligak. Talde oso indartsuak daude Euskal Ligan, eta ia denak bere klubeko lehen taldeak dira». Jokalarientzat ere motibagarria dela gaineratu du: «Lehiakortasun hori izatea eta datorren denboraldian maila mantentzeko helburu hori izatea garrantzitsua da beraientzat». Bestalde, jubeniletatik igotzen direnek ere, lehen taldera iristeko bide horretan, maila altu batean jokatzeko aukera dute bigarren taldearekin, esperientzia handituz eta lehen taldean jokatzeak suposatu dezakeen jauzia txikiagoa bihurtuz.