Tolosako Udalak, Tolargik eta Tolosagasak 2023ko egutegia osatuko duten argazkiak hautatzeko lehiaketa abiatu dute gaur. Urte hasieran aurkeztu zuen udalak 2023ko egutegia osatzeko aurtengo Tolosanklisk argazki lehaiketarako gaia: Kirola Tolosan. Dagoeneko webgunea prest dago eta jada argazkiak bidaltzeko aukera dute herritarrek, irailak 30 arte; argazkiak webgunearen bidez bidali behar dira. Urriaren 7an emango du udalak irabazleen berri, eta azaroaren 16tik aurrera hasiko dira hurrengo urteko egutegiak banatzen.
Tolosan erroldatutako guztiei irekita dago lehiaketa. Argazkiak argitaragabeak eta beste lehiaketetan saritu gabeak izan behar dute, eta parte-hartzaile bakoitzak gehienez 5 argazki aurkeztu ahal izango ditu lehiaketara. Parte-hartzaileek galdetegi bat bete behar dute proposamenak aurkezterakoan. Lehen aipatutako webgunean kontsultatu daitezke lehiaketaren oinarriak eta baldintzen inguruko informazioa.
Sariei dagokienez, egutegiaren azalerako argazkiaren egileak 600 euro irabaziko ditu, eta egutegiko hilabete bakoitzeko argazkien egile bakoitzari 200 euro emango dizkiete.