Urtarrilean hasi zituen Tolosako Udalak Izaskun auzoa irisgarriagoa egiteko eta oinezkoen gunea hobetzeko lanak, eta amaitu ditu dagoeneko. "Auzoko bizilagunak, batez ere, adineko pertsonak direla kontuan izanik, eremu hori herritarrentzat atseginagoa, irisgarriagoa eta seguruagoa izateko helburuarekin egin dira lanak", esan dute.
Iaz, urte amaieran, Zabalarreta parkeko sarbideetako batean arrapala berria eraiki zuen udalak. Orain, zehazki Igeralde kaleko 17 eta 19 atarien parean, eskailerak eta arrapala berria egin ditu, irisgarritasuna hobetuta, auzoko bizilagunei herri erdigunera iristeko bidea errazteko.