Igarondo Urpekoak taldeak antolatzen duen txapelketa Usabal kiroldegiko igerilekuan jokatuko da, eta 10:00etan hasiko da goizeko txanda, eta 16:00etan arratsaldekoa. Taldetik esan dutenez, bost erkidegotik (Katalunia, Gaztela, Aragoi, Nafarroa eta Euskadi) etorritako, 12 -15 urte bitarteko 180 gazte inguruk hartuko dute parte. Igarondo Urpekoak taldeko bost igerilarik parte hartuko dute, eta beraientzat esperientzia polita izatea espero dute.
50 metrotik hasi eta 400 metro arteko probak egin beharko dituzte igerilariek; «ikustera gerturatzen direnentzat oso formatu ikusgarria izango dela uste dugu», azaldu dute.
Txapelketaren helburua Roberto Jauregi omentzea da, «ahal den era onenean, igeri egiten». Izan ere, taldetik gogoratu dutenez, «Jauregi hegats igeriketa Tolosara ekarri zuen entrenatzailea izan zen eta edozein kirolari laguntzeko prest izaten zelako beti ezagutzen dute tolosar askok».
Bestalde, Igarondo Urpekoak taldeak Tolosako Udala nahiz Hegats Igeriketa Txapelketa aurrera ateratzen lagundu duten babesleak eskertu nahi ditu.
Maiatzaren azken larunbatean egin ohi dute Tolosan Roberto Jauregiren oroimenezko hegats igeriketa txapelketa, eta datorren larunbatean, hilaren 28an, egokitu da aurtengoa. Hemeretzigarrena izango da aurten.
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!
EGIN ATARIKIDE!