Horien artean Tolosaldea IKTko bi igerilari izan ziren: Nahia Garridok laugarren egin zuen eta Enaitz Goñik zortzigarren. Beste sei saridunak Bidasoa taldekoak izan ziren: 1. Maialen Rohrbach, 2. Amaia Zendoia, 3. Ainhoa Martin, 5. Ion Mujika, 6. Juncal Cuñado eta 7. Asier Iguiñiz.
Tolosaldea IKTko Nerea Pagola entrenatzaileak dioenez, «gure taldekoak oso ondo aritu ziren. Gutxienekoak lortu ziren Euskadiko Txapelketarako, zein Espainiako Txapelketarako. Ekainean ditugu txapelketa garrantzitsuak eta uztailean are garrantzitsuagoak, baina dagoeneko marka politak ikusten hasi gara».
UNDERWATER PRESTAKUNTZA
Larunbat arratsaldean, berriz, Underwater prestakuntza saioa egin zuten Usabal igerilekuan, Espainiako Federazioaren eskutik, eta Euskadiko Federazioak antolatuta. Santi Veiga teknikaria eta Aschwin Wildeboer igerilari ohiak eman zuten prestakuntza. Saioan 30 igerilari inguru eta beste hogei bat entrenatzaile izan ziren.