Bide ertzetako belarrak moztuko ditu udalak zenbait gunetan

Tolosaldeko Ataria 2022ko mai. 13a, 10:23

Astelehenean, asteartean eta asteazkenean moztuko dituzte bide ertzetako belarrak eta, lanen eraginez, denbora batez ezingo da aparkatu hainbat gunetan.

Astelehenetik asteazkenera bitarte, herriko bide ertzetako belarrak moztuko ditu hainbat gunetan Tolosako Udalak, "herria txukun eta atsegin mantentzeko". Astelehenean, Bentaundi eta Araba etorbidea bitarteko bide ertzetako belarrak moztuko dituzte, baita Artzabaltza sarreraren eta egurrezko zubiaren bitarteko gunekoak ere. Lanen ondorioz, astelehenean ezingo da Bentaundiko aparkalekuetan aparkatu.

Asteartean, Izaskungo igoeran ariko dira lanean; hortaz, ezingo da N1 errepidearen inguruko aparkalekuan autorik utzi. Horrez gain, San Estebanen ere moztuko dituzte belarrak; beraz, auzoko 20. zenbaki ondoko aparkalekuan ere ezingo da aparkatu, ezta San Estebango muturretik Laskoraingoiko poligono ondoko ezpondara bitarteko bidean ere.

Azkenik, asteazkenean, Txarama gaineko bidean eta zirkua egon den aparkalekuan moztuko dituzte bide ertzetako belarrak. Lanek irauten duten bitartean, ezingo da aparkatu gune horietan. 

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!