Tolosarrarekin batera ariko dira Iker Intza Ortiz de Zarate bergararra antolakuntza arduradun bezala eta Ione Mugertza Egaña zumaiarra Gazte Abertzaleakeko ordezkari gisa. Bokalak Errenteriako Garazi Lopez de Etxezarreta, Zumaiako Iñaki Ostolaza Esnal eta Oiartzungo Joxe Mari Mitxelena Cazabon izango dira.
Koordinatzaileak esan du ezinbestekoa dela Gipuzkoak erronka demografikoari bi aldetatik aurre egitea. "Alde batetik, gure adinekoei bizitza duina bermatzea da helburua, gizarte zerbitzu gehiago eta hobeekin, EAJk egin ohi dituen murrizketa eta pribatizaziorik gabe. Eta bestetik, gazteek bizi proiektu bat garatu ahal izatea bermatu behar da". Horretarako lanean ematen den prekarietatearekin eta alokairuaren gehiegizko prezioarekin amaitu behar dela esan du. "Gipuzkoa da estatuko metro koadro bakoitzeko preziorik garestiena duen lurraldea, Gipuzkoako gazteek ia ezinezkoa dute emantzipatzea eta Eusko Jaurlaritzaren Gaztelagun bezalako programek porrot egin dute", gaineratu du.