Tolosako Ekinbide Etxeak, Musikenerekin lankidetzan, formatu txikiko lau kontzertu antolatu ditu maiatzeko larunbat guztietarako, Maiatzeko Doinuak izenburupean. Topic-en izango dira, 11:30ean. Horrela, Tolosako Ekinbide Etxeak jarduera berri bati atea ireki dio, bere jarduera-esparrua zabaltzeko.
Musikenen 5 master ofizial daude eta horietako bat interpretazio klasikoa da. Bertako ikasleek garatzen duten ikasketa-planaren barruan, kanpoko proiektua izeneko ikasgai bat dago, non kontzertu bat edo gehiago sortu behar duten. “Ziklo honetan parte hartuko duten taldeak interpretazio klasikoko masterreko ikasle guztiak dira, eta publikoarentzat interes berezia duten proiektuak sortzen dituzte. Kasu honetan, lau kontzertu sortu dira, estilo desberdinetakoak eta talde desberdinetakoak", azaldu dute Musikeneko ordezkariek.
Larunbatean, hilak 7, hasiko da zikloa. Manuel Madamasek eta Víctor Vigok osatutako Mavik Mila tronpeta eta akordeoi bikoteak, Albinoni, Scarlatti eta Piazzollaren lanak eskainiko dituzte, besteak beste.
Hurrengo hitzordua, hilaren 14an izango da: Marta Judith Angulo saxofoi-jotzaileak, Teresa Castañon eta Leticia del Monte klarinete-jotzaileek eta Narayan Rishi saxofoi-jotzaileak eskainiko dute kontzertua. Bere errepertorioa Singelee, Marquez, Iturralde eta Romeroren obretan oinarrituko da.
Hilaren 21ean, Sergio Bolaños biolin-jotzailea, Teresa Castañon klarinete-jotzailea eta Raquel Fernández piano-jotzailea ariko dira Bartok, Milhaud eta Khachaturianen piezak interpretatzen.
Ensemble Bidaiak taldeak itxiko du zikloa, maiatzaren 28an. Olivia Fernandez eta Dario Muñoz biolin-jotzaileek, Eloise Fagalde biolontxelo-jotzaileak eta Hiram Vega piano-jotzaileak, Mozart, Beethoven eta Berioten lanak interpretatuko dituzte.