Laugarren izan dira TAK-eko kadete neskak Espainiako Txapelketan

Tolosaldea Arraun Klubeko (TAK) kadete neskek laugarren postua eskuratu dute batelen Espainiako Txapelketan. Uxue Lizeaga, Ihintza Eizagirre, Amal Birawi eta Inge Goenaga arraunlariek eta Maddi Balerdi patroiak osatu dute batela.

Pasaian jokatu zen asteburuan txapelketa. Larunbatean kanporaketak jokatu ziren eta beraien txandan bigarren postua lortu zuten eskualdekoek, finalera sailkatuz. Guztira bost batelek parte hartu zuten finalean eta laugarren postua gutxigatik lortu zuten TAKekoek, bosgarren izan zen Hernaniri 39 ehunenekorengatik irabazi baitzieten.

Euskadiko Txapelketan bigarren izanik lortu zuten Espainiako Txapelketarako sailkatzea, eta klubetik batel bakarra izan da lorpen hori eskuratzen. «Denboraldia joan den moduan ikusita, ez genuen espero Espainiako Txapelketara iristea, eta gainera laugarren postuan geratzea», esan du Manex Balerdi kadete nesken entrenatzaileak. «Urte txarra izan da arraunlarientzat eta klubarentzat, ezin izan dugulako entrenatu Oria ibaian». Espainiako Txapelketan «esperientziaz disfrutatzea» izan da helburua eta «oso pozik» geratu dira finalerako sailkatu ahal izan zirelako.

Txapelketen denboraldi ofiziala bukatu da TAK-eko batelentzat, baina beste bi estropadatan parte hartuko dute. Horietako bat Lapuebla de Labarcan izango da, eta bestea Pasaian. Azken honetan batel mistoek parte hartuko dute.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!