Euskaltzaindiak ikur-diplomak banatu dizkie iaz izendatutako urgazle berriei. Bilkura Baionako Herriko Etxean egin dute eta txistularien musikak girotu du ekitaldia. Andres Urrutia euskaltzainburuak eta Xabier Parrilla Etchart Baionako auzapez-ordeak egin die harrera urgazle berriei.
Bere mintzaldian, Urrutiak gogoratu die Akademiak kontuan izan dituela beraien merituak euskararen alorrean, baina ondoren etorkizunari begira jarri da Urrutia: “Izendatuak izan zarete, eta orain dator bigarrena, alegia, zuen lanak eta ahaleginak gauzatzea Akademiaren barruan. Laster jakingo duzue nolakoa izango den zuen partaidetza, Akademiaren egunerokotasuna ezagutu dezazuen eta zuen ekarpenak egin ditzazuen”.
2021ean urgazle izendatutako euskaltzaleen artean daude Kike Amonarriz eta Asun Garikano tolosarrak. Gipuzkoakoak, Ipar Euskal Herrikoak eta Bizkaikoak baino ez ziren izendatu iaz. Arabakoak 2015ean izendatu ziren eta Nafarroako azken urgazleak 2016an.