Topic Txotxongiloen Nazioarteko zentroak, beste urte batez, Fotopic ekimena jarri du martxan. Maiatzaren 13an ospatzen da Museoen Nazioarteko Eguna, eta azaldu dutenez, "museoek gure gizartearen eta kulturaren garapenean duten zereginaz kontzientziatzea" du helburu.
Hala, txotxongiloak eta argazkigintza maite duen edonor gonbidatu dute txotxongiloen zentrotik museoan argazkiak egitera. Parte hartu nahi dutenak museoan dohainik sartu ahal izango dira argazkiak egitera, sarreran identifikatuz, eta maiatzaren 13a baino lehen bidali beharko dute egiten duten irudien aukeraketa museo@cittolosa.com helbidera.
Argazkiak Topic zentroaren webgunean elkarbanatuko dituzte (Topictolosa.com) eta guztiekin batera, Topic-en bertan argazki erakusketa bat jarriko dute maiatzean. Parte-hartzaile guztien artean bi sari zozkatuko dituzte: Topic-eko txotxongilo bat, Topic-en txotxongiloen ikuskizunak ikusteko bi bonu, 2022ko irailetik 2023ko ekainera arte, eta Leidor zinemarako, urtea bukatu baino lehenago erabili beharreko bi zinema-bonu.