Tolofolk jaialdiak aurrera jarraitzen du; laugarren eguna du gaurkoa. Bihar amaituko da, eta orain arte bertako nahiz estatu mailako artisten saioez gozatzeko aukera izan dute herritarrek. Gaur arratsaldean, nazioarteko musikari baten emanaldia izango da Euskal Herria plazan (euria eginez gero, Berdura plazan).
Goizean, baina, Tolosaldeko, Asturiasko eta Kataluniako musika taldeen txanda izan da; kalejiran aritu dira, herriko txoko ezberdinetan. Eskualdeko taldeei dagokionez, Udaberri Dantza Taldeko fanfarreak, Giro Arte dultzainero taldeak eta Ozenki txistulari taldeak hartu dute parte; Asturiastik gaiteroak etorri dira, eta Kataluniako Torrelles de Llobregat herritik, berriz, grallerrak.
Arratsaldean, saio bikoitza izango da: 19:00etan, Yesun Erdene Mongoliako musikari, kantu-irakasle eta bakarlaria entzuteko aukera izango da, eta 20:00etan, Iraide Ansorena tolosarraren Khami folk taldeak kontzertua eskainiko du.
Amaitzeko, bihar 19:00etan, iparraldeko folka izango da Plaza Berrian (euria eginez gero, Berdura plazan): Jean Mixel Bedaxagar eta Mixel Etxekopar artista zuberotarrek eta Xendarineko ahizpa kantariek agertokia partekatuko dute.
