Apirilaren 30ean, larunbata, Ilarduia herrian dagoen Leze arroila jaitsiko dute. "Arroil berezia da, kobazulo bat da eta", azaldu dute antolatzaileek. Jaitsierako rapelik handienak 22 metro dituela gaineratu dute. Hurrengo egunean, maiatzaren 1ean, Ultzurrun herrira joango dira, eta Artazul arroila jaitsiko dute; bertako rapel handienak 43 metro ditu.
Eraman beharreko materialaren berri ere eman du elkarteak: neoprenoa, eskarpinak, kaskoa, arnesa (zortzia) eta lotzeko kaboa. Larunbaterako, gainera, frontala eramatea ezinbestekoa izango dela adierazi dute. Horrez gain, neoprenozko eskularruak eramatea gomendatu dute. Nahi duenak, neoprenoa, kaskoa eta arnesa alokatu ditzake mendi elkartean.
Izena emateko azken eguna hilaren 28a (osteguna) izango da, eta bi aukera daude horretarako: oargimendi@gmail.com helbidera mezua bidaliz edo 688 698 642 telefono zenbakira deituz.