Tolosako Jabetze Eskolaren udaberriko egitarauaren barruan Ameli eta Xirrikituen jostunek Munduko emakumeak narrazio musikatua eskainiko dute apirilaren 25ean. Tolosako kultur etxean izango da saioa, euskaraz, 18:00etatik aurrera. Parte hartu nahi dutenek, saioaren aurretik eman beharko dute izena honako esteka honetan: https://www.tolosakoudala.org/berdintasuna.
Helduentzako ipuin kontaketa musikatua da. Euskal Herrian bizi diren lau emakume migratuen eta bertako baten istorioak kontatzen dituzte, eta egileek obra "gordin bezain hunkigarri" bezala definitu dute.
"Munduak badu txokorik, eta txoko horietako batzuetan istorioak sartu egiten dira, sortu egiten dituzte, eta eraldatu ere bai. Eta hala, kontaketa honetan, bost emakumeren istorioak kontatuko dizkizuegu, munduko bazter batean edo bestean bizi diren emakumeenak. Haien indarrak elkartuz eta haiengan sinetsiz sortu dugu kontakizuna", esan dute Ameli eta Xirrikituen jostunek.